Sunday, April 13, 2008

Ang Milagro Sa Golgota [Sikyop, Gusa, CDO]

BROD JEFFREY (NAKA WHEEL CHAIR ) SAKSI SA MILAGRO
NI BIRHEN MEDALYA MILAGROSA SA GOLGOTA, SIKYOP ,GUSA,CDO, PHILIPPINES

ESPIRITUHANON NGA PAGTULON-AN

Ang Spiritual Charismatic Mother of Mercy usa ka katoliko nga pagtulon-an nahimutang sa Agora, Lapasan, Cagayan De Oro City pinangulohan kini ni Brod Jacob (Segundo Raganot ang tinuod nga pangalan) ug nagpahigayon kini ug mga “evangelical mission” o pagsangyaw sa bibliya diin pinaagi sa giya sa Espiritu Santo sa Dios nagatambal usab kini sila sa mga masakiton diha sa mga misyon ug worship o pagdayeg sa Dios.

SEMANA SANTA 2008

Niining semana santa sa Marso 2008, ang maong grupo, pinaagi sa giya sa espirito santo sa Dios nagpahigayun sa usa ka kasaulogan sa kasakit diha dapit sa bukiran sa Sikyop, Gusa, Cagayan De Oro City diin gitawag kini ug Golgota ug ang agianan niini mora gayud ug kalbaryo susama sa nahitala diha sa balaang kasulatan.

Daghan ang niduyog sa maong sakripisyo diin ang uban niini gikan pa sa Mayuga, Guindulman, Bohol, Mandaue , Cebu, Gingoog City, Alae, M.Fortich, Bukidnon ug diha mismo sa maong lugar sa Gusa ug Cugman ug ingon usab sa poblasyon sa siyudad sa Cagayan de Oro nga nagasunod usab sa maong pagtulon-an. Mga dosyentos (200) ka tawo apil ang mga bata nga miapil sa maong pasyon sa krus , diin nag sugod kini sa Huwebes Santo sa may ubos nga bahin sa maong lugar ug adunay bag-o nga kapilya ni San Vicente Ferrer nga gitukod sa “Spiritual Charismatic Leader” didtong dapita nga ginganlan ug Santiago.

ESTASYON SA KRUS

Sa pagka Biyernes Santo sa may alas dose (12:00 Noon) sa udtong tutok ubos sa naglagiting nga kainit sa adlaw nagsugod ang pasyon sa krus sa katorse (14) ka estasyon, diin ang tanan nga motambong kinahanglan gayud nga magtini-il, ang mga babaye magpalda ug magturong diin lubos gayud kini puti, ug ang mga lalaki mag puti usab ug T-shirt, ug wala gayuy mag suot ug kalo ug ang tanan magasul-ob sa ilang armadura, ang mga lalaki, “crucifix” ug ang mga babaye rosaryohan.

Igo-igo gayud nga baklay diin ang uban nagabitbit sa ilang mga gamit kay didto na man usab unya kami mangatulog sa maong lugar nga gitawag ug Golgota niananang Biyernes sa gabii hangtod na sa pagkabanhaw. Kini makapahinumdom kanako sa kasulatan ni Moises sa “Exodus” ug usab sa pag-alsa ni Jesu Cristo sa mabug-at nga krus didto sa bukid sa Golgota, sumala sa istorya diha sa bibliya nga nahitabo dos mil na kapin katuig ang milabay ug diin makapahinuklog ang maong talan-awon sa pasyon sa krus diin mitabok pa kami ug duha ka suba ug gipangpas-an ang mga masakiton labina kadtong nag “wheel chair”.
:
Ginganlan ug Brod Esteban ang nagpas-an sa dakong krus diin hapit gayud ug tulo (3) ka oras ang mao nga pasyon sa krus diin nagbaklay nga nagtini-il ug gi-antos niya ang kalapoy, kainit sa adlaw , ka-uhaw isip sakripisyo sa iyang kaugalingon diin mao usab ang giya nga gihatag kaniya sa espiritu santo.

KUBADA ERA, GOLGOTA ( SIKYOP , GUSA )

Biyernes ug Sabado Santo didto na kami mangatulog sa maong lugar sa Kobada Era, Golgota , ginganlan kini ug Sikyop sakop sa Cugman diin adunay nakapahimutang didto nga Groto sa Birhen Medalya Milagrosa. Taud-taod na ang maong groto napahimutang didtong dapita diin aduna kini bag-o ug dako nga imahen sa maong Birhen nga gipalit pa gayud gikan sa Manila ug gidunar sa bana sa usa ka Spiritual Charismatic Leader didtong dapita nga ginganlan ug Sister Marta.
:
BIRHEN MEDALYA MILAGROSA

Milagrosa ang kaagi sa maong Birhen Medalya Milagrosa diin nagagikan pa ang istorya niini sa Paris, France sa ika-dise-otso nga siglo (18th Century ) ug mikuyanap na sa tibo-ok kalibutan ang mga milagro niini. Daghan ang nangamuyo sa maong birhen diha sa maong lugar sa Golgota , Gusa niadtong tungora ug ang tanan naghatag sa ilang pagdayeg ug pag-ampo.

Domingo sa alas tres kaadlawon (3:00 a.m.) nagsugod ang ritwal sa pagkabanhaw, diin sadya ang mga bata nga gibutangan ug pako sa anghel nga binuhat sa karton ug nanag-awit sa pagdayeg sa mga alawiton sa Dios.

ANG MILAGRO SA "EASTER SUNDAY"

Alas otso sa kabuntagon (8:00 a.m.) nagsugod sa paghealing sa "holy spirit" sa Birhen Medalya Milagrosa diin gigamit nga “medium’ o tuburan mao ang taga Gusa nga ginganlan ug Brod Pedro ug maoy iyang gihilot ang usa ka batan-ong lalaki nga ginganlan ug Brod Jeffrey nga usa na ka tuig na nga dili maka tindog tungod sa pasmo sa ugat sa iyang tiil, sa sinugdan ngapanggunit pa si Brod Jeffrey sa maong paghilot dihang gipatindog siya apan sa ikaduhang paghilot nakatindog na ang maong binuhat ug makabaklay na sa iyang tiil pero mohawid pa una siya sa abaga sa maong naghilot kaniya.

HUGOT NGA PAGTOO SA DIOS

Mao kini ang milagro nga gipakita didto Groto sa Mahal nga birhen Medalya Milagrosa sa Golgota, Bukid sa Gusa, atol sa himaya sa pagkabanhaw o “Easter Sunday”, ug si Brod Jeffrey karon hinay-hinay na nga makatindog diin wala na mogamit sa “wheel chair” ug hinay-hinay nga mibaskog ang iyang mga tiil. Apan kini nga milagro nahitabo tungod usab sa hingpit nga pagsalig ug pagto-o sa Dios ni Brod Jeffrey ug ingon man ang tinud-anay nga pagbasol sa iyang mga kasal-anan, ug inubanan usab sa mga pag-ampo sa iyang mga ginikanan, igsoon ug kaparyentehan ug ilabina sa kauban niya sa maong pagtolun-an.
:
Sa bag-ohay pa nahimutang ang maong Birhen Milagrosa sa maong Groto nakasinati na usab sa milagro si Sister Marta nga leader sa Spiritual Charismatic didtong dapita diin iyang gipangayo didto mismo sa groto sa mahal nga birhen inubanan sa hugot nga pagtoo ug pag-ampo ug diin pinaagi usab sa panabang sa mahal ng Birhen Medalya Milagrosa nakagawas ug nakatrabaho gayud si Sister Marta sa laing nasud diin insegida dayun siyang nakalarga ug wala siya maglisod sa mga papeles.
:
ANG KAMATUORAN

Nagpasabot lamang igsoon nga buhi si Jesu Cristo nga atong Dios ug ang tanan nga mitoo kaniya maluwas ug mahatagan sa kinabuhing dayun. Walay moadto sa Dios Amahan kun dili moagi kaniya, kay si Jesu Cristo mao ang sinugdanan ug ang kataposan.
:
ANG GUSTO MOBISITA SA GROTO:
:
Didto kini agi-on sa J.R. Borja Extension (Galaxy) sa may "dead end" sa Gusa nga dapit , Cagayan de Oro, diin modiritso na kita sa macadam road (east side) paingon sa " Gravel and Sand Quarry" o nagmina ug grabas ug mga tulo ka kilometro (3 km) kini gikan sa dead end ug pwede pa makaagi ang sakyanan hangtod sa quarry. Adunay mga commercial nga trisikad nga molahos gayud ngadto sa maong quarry diin tag otso pesos (P8.00) ang pletihan matag tawo.

:

Sa pagsulod na nimo sa maong bukid nga bahin diin atua dito ang maong groto, motabok ka pa sa suba nga "Biga-an River" , tagatuhod kung ting-init ang tubig apan kun baha o gikan ga-ulan tagahawak usab ang tubig, diin magbaklay ug mga duha ka kilometro (2 km.) nga medyo hanayhay nga bangilid ug diin ang maong lugar nga nahimutangan sa groto usa kini ka farm ug gitawag kini nga lugar sa mga tagadidto ug "Sikyop". Daghan ug agi-anan ang maong lugar diin molahos kini ngadto sa Barangay Malasag ug Eco-Village, mas maayo nga mangutana diha sa mga tawo nga namuyo sa duol sa agianan paingon sa maong quarry kay baga pa ug kahoy ang maong lugar.:

:

Sa paghidangat sa maong groto kinahanglan ang babaye magsayal ug magpandong ug puti ug magtiniil samtang mag-ampo o mangadye sa santos nga rosaryo. Ang mga lalaki magtiniil gihapon ug dili magkalo. Wala gayuy magsuot ug itom nga sinina panahun sa pag-ampo o pagdayeg ug ingon man tangtangon ang mga relo ug kuwentas ug tago-an una samtang anaa sa pagdayeg sa Diyos.

:

Adunay piniyalan nga usa ka babaye nga ginganlan ug "Nanay Neneng" nga maoy nagbantay sa maong farm diin nahimutang ang maong groto. Siya usab ang gitahasan sa Dios sa pagbantay sa maong groto kay matod pa niya nga mga duha o tulo na katuig ang milabay kanunay nagpadamgo kaniya ang maong Birhen Milagrosa nga siya gayod ang moatiman niini. Bisan tuod ug dili siya Catholic apan mitoo siya sa giya sa mahal nga birhen pinaagi sa iyang damgo ug mituman gayud siya sa maong hangyo kaniya sa Mahal nga Birhen hangtod niining panahuna.

:

WORSHIP SCHEDULE :
::
Adunay worship o pagdayeg sa Dios nga pagahimoon didto mismo sa maong groto sa mahal nga Birhen Medalya Milagrosa matag Unang Domingo sa matag Bulan (First Sunday of Every Month) nga magsugod sa matag alas nuebe sa buntag (9:00 A.M.) diin pagadumalahon kini sa mga spiritual charistmatic leader didtong dapita, pinangulohan kini nila ni Brod Santiago ug Sister Marta.
:
Molungtad ug lima ngadto sa unom ka oras (5 ~ 6 hrs) ang maong worship diin mag-una ang santos nga rosaryo, dayun ang pagpamati sa mensahe sa Dios Espiritu Santo pinaagi sa iyang mga tuburan o propeta ayha dayun ang pag-ukab sa balaang kasulatan diin bisan kinsa nga gidasig puwede nga mopa-ambit sa iyang kaugalingong pagsabot sa maong ebanghelyo sa bibliya. Mosunod usab dayun ang pag healing o pagpandong sa mga masakiton ug ingon man ang paghilot o pagpahapyud niini. Gikinahanglan gayud sa tanang mga nagtambong sa maong worship ang pagpa-purify pinaagi sa holy oil ug holy water diha sa mga leader diin susama kini sa pagpangalawat sa lawas ni Jesu Cristo.
:
Puwede nga magbalon ang mga motambong sa maong worship apan aduna usay gipreparar ang maong spiritual group nga inato nga paniudto diin libre kini para sa tanan. Ang tanan nga gidasig puede moapil sa maong worship ug ingon man sa pagpatambal usab diin libre kini nga ug walay bayad kay gasa kini gikan sa Dios ug ang imong kaayuhan sa imong sakit nagaagad usab sa imong hingpit ug bug-os nga pagtoo Kaniya ug sa imong hinay-hinay ug kanunay nga pag-ampo. Dawaton ang tanan nga tinuohan o relihiyon nga gusto moapil niining maong pagpahealing kay kitang tanan katawhan man sa Dios.: